[Lajmet nga agjencite shqiptare te lajmeve]

SHBA, kapet shqiptari, grabiti 500 mijë $

Thu, 01 Mar 2012 16:52:03 +0100

Grabitësi i bankës që besohet se është Mazari

SHBA – Një shqiptar i kërkuar për vrasje është arrestuar dje në Nju Jersi, SHBA. Arrestimi i tij është bërë pasi dyshohet se ka lidhje me vjedhjen e dy bankave. Sipas autoriteteve nga këto grabitje janë marrë 500 mijë dollarë.

FBI ka njoftuar se nuk ka qenë e lehtë kapja e Shpend Mazarit, 26 vjeç nga Puka

Mazari gjithashtu do të akuzohet edhe për hyrje të paligjshme në SHBA. Po ashtu ai është në kërkim nga Interpol për vrasjen të kryer në Shqipëri në vitin 2004. /F.S/ (Shekulli Online)

Plagos 38-vjeçarin dhe më pas vret veten

Thu, 01 Mar 2012 16:08:19 +0100

GJIROKASTËR- Një sherr banal është kthyer në një tragjedi të vërtetë, me një të vdekur dhe një të plagosur. Ngjarja u regjistrua pas mesditës në fshatin Sofratikë të komunës së Dropullit të Poshtëm.

Burime zyrtare të policisë kanë bërë të ditur se shtetasit Agim Dida, 55 vjeç, banues në Luftinë, Tepelenë dhe Alket Salaj, 38 vjeç, banues në Hallkomemaj, Tepelenë, duke pirë kafe në njërin prej lokaleve të fshatit Sofratikë, janë grindur me njëri-tjetrin.

Më pas, shtetasi Agim Dida e ka plagosur me pistoletë në gjoks shtetasin Alket Salaj, i cili ndodhet në gjendje të rëndë në spital. “Dida është larguar në drejtim të fushave, ku pas 500 metrash ka qëlluar veten me pistoletë dhe ka gjetur vdekjen e menjëhershme”, bëjnë të ditur këto burime.

Sipas dëshmive të para sherri ka ndodhur për motive banale, ndërsa policia po punon për zbardhjen e plotë të rrethanave të kësaj ngjarjeje të rëndë. /E.B/

(Shekulli Online)

Vendos, sa më shpejt, të ardhmen

Thu, 01 Mar 2012 15:46:03 +0100

Pep Guardiola

Zëdhenësi i Barcelonës, Toni Freiksa, ka bërë thirrje për ta lënë të qetë trajnerin, Pep Guardiola, pavarësisht spekulimeve në rritje dhe debatit mbi të ardhmen e tij me klubin. Guardiolës i skadon kontrata verën e ardhshme dhe ka kërkuar kohë për të reflektuar nëse do të nënshkruajë një tjetër kontratë 1-vjeçare me gjigantët katalanas. Duke parë se ka udhëhequr “blaugranat” drejt 13 titujve, që kur ka mbërritur në “Camp Nou” në 2008-n, Freiksa beson se kërkesa e ish-lojtarit të Spanjës duhet të respektohet.

“Ajo që ka kërkuar Guardiola është e kuptueshme dhe ai duhet të lejohet të punojë në paqe”, tha zëdhenësi i Barçës për “8TV”. “Është normale për dikë, që ka shpenzuar 4 vite në nivelet maksimale, që të mendojë për gjëra si kjo”. Freiksa shprehu “besimin e tij të plotë” ndaj Guardiolës dhe lavdëroi 41-vjeçarin si “trajnerin më të mirë që Barcelona mund të ketë”.

Gjithsesi, zëdhenësi i klubit kërkoi të siguronte tifozët se Barça nuk do të mbetet në mëshirë të fatit, edhe nëse Guardiola vendos të largohet nga posti i tij. “Guardiola, Andoni Zubizarreta (drejtori sportiv) dhe pjesa tjetër e skuadrës janë duke planifikuar sezonin e ardhshëm”, zbuloi Freiksa.

“Klubi do të vazhdojë rrugën e tij, me Guardiolën apo me ndonjë trajner tjetër, dhe sërish do të mbetet ekipi më i mirë në botë. Nuk duhet të shqetësohemi për këtë gjë”. Guardiola kaloi një sezon në krye të ekipit B të Barcelonës, përpara se të merrte drejtimin e ekipit të parë, kur Frenk Rajkard u largua 4 vite më parë. (Shekulli Online)

Topi dekoreton 10 ish-të përndjekur

Thu, 01 Mar 2012 15:46:03 +0100

Topi dekoron ish-të përndjekur politikë dhe figura me kontribute të spikatura për demokracinë shqiptare

Presidenti Bamir Topi ka dekretuar me medalje 10 personalitet për kontribut në rrëzimin e diktuarës komuniste.

Topi ka nderuar me medaljen “Martir i Demokracisë”, Mark Sokolin (Pas vdekjes) dhe Gjergj Sokolin (Pas vdekjes). Me Medaljen “Pishtar i Demokracisë”, Topi dekoroi Ardian Elezin, ndërsa me “Medaljen e Mirënjohjes”, Raif Elezin, Gëzim Kalajën, Adrian Katin, Ylli Tasin, Ylli Tabakun, Feim Iljazin (Boshanji) (Pas vdekjes) dhe zotin Yllbardh Bodinaku.

Të pranishëm në ceremoni e dhënies së medaljeve ishin ambasadori i Mbretërisë së Danimarkës Karsten Ankjaer Jensen, Avokati i Popullit, Igli Totozani dhe drejtues të Shoqatës Mbarëkombëtare për Integrimin e të Burgosurve dhe të Përndjekurve Politikë./F.S/ (Shekulli Online)

Pretendon se është 127 vjeç, por duket e pabesueshme

Thu, 01 Mar 2012 15:23:06 +0100

Juana Bautista de la Candelaria Rodriguez

Një grua e cila pretendon se është njeriu më e vjetër në botë, nuk është e besueshme nga zyrtarët e librit të Rekordeve Guinness. Juana Bautista de la Candelaria Rodriguez thotë se ka lindur në vitin 1885, gjë e cila e bën atë më të vjetër se Statuja e Lirisë në Nju Jork.

Kjo gjithashtu do të thotë se ajo është 12 vite më e vjetër se mbajtësja e rekordit, amerikanja Bese Cooper, e cila është 115 vjeçe.

Karta e identitetit të Juanës thotë se ajo ka lindur me 2 shkurt të 1885 në Ceiba Hueca, në Kubë, ku ajo ende jeton.

Por zyrtarët e gjerondologjisë, të cilët verifikojnë pretendimet për librin e Rekordeve Guinness, besojnë se ajo ka ndryshuar moshën. “Të dhënat nuk na japin arsye që të besojmë këtë pretendim”, thotë Robert D Young. “Nëse shikon dokumentet që ajo disponon, duket se janë të viteve 1950”.

Gjithashtu ai thotë se ajo duket mjaft e zhdërvjellët për moshën që pretendon se ka, lëvizjet, e folura dhe qëndrimi nuk janë karakteristika fizike që mund të ketë një persona në moshën 127 vjeç. /F.S/ (Shekulli Online)

Kërkonin një qen për aventurat seksuale, gjejnë prangat e policisë

Thu, 01 Mar 2012 15:23:05 +0100

Shane Walker dhe e shoqja, Sarah Dae

Një çift amerikan dhe një person i tretë kanë rënë pre e një operacioni të fshehtë policor, duke përfunduar të arrestuar për bashkëpunim në kryerjen e marrëdhënieve seksuale me kafshë.

Shane Walker dhe e shoqja Sarah Dae, të cilët u shprehën në polici se ndiqnin praktikat e shkëmbimit të partnerëve dhe kishin një martesë të hapur, u zbuluan teksa planifikonin kryerjen e marrëdhënies së çuditshme së bashku me të dashurin e gruas.

Dy meshkujt kishin planifikuar të shikonin gruan duke kryer marrëdhënie me një qen të racës Golden Shepherd, për të cilin kishin nisur kërkimet në faqen e njoftimeve Craiglist.

Walker, 38 vjeç, është asistent fluturimesh, ndërsa e shoqja, 34 vjeçe, ushtron në mënyrë të pavarur profesionin e fotografes.

Ata kishin shkëmbyer e-maile me pronarin e një qeni të tillë për tre javë. I zoti i “viktimës” së mundshme kishte kontaktuar policinë, e cila pasi ka ndjekur gjurmët, ka arrestuar treshen me shije të çuditshme.

Joe Arpaio, sherifi i kontesë Maricopa, ku ndodhi ngjarja, u shpreh: Njerëzit që kërkojnë këtë lloj kënaqësie janë padyshim një racë tjetër, ndryshe nga e jona.

Arpaio, i njohur si një prej sherifëve më të ashpër të Amerikës për shkak të qëndrimeve të tij ndaj emigrantëve ilegalë, kërkoi që faqja e Craiglist të monitorohet më në detaje, një apel ky i përsëritur pas një rasti të ngjashëm një vit më parë. / G. N.

(Shekulli Online)

Afganistan, vriten dy trupa të NATO-s, nuk dihet kombësia e tyre

Thu, 01 Mar 2012 15:01:32 +0100

Protesta e afganëve për djegien e Kuranit

NATO ka njoftuar se dy trupa të saj janë qëlluar për vdekjen në Afganistan nga sulmi i fundit pas djegies së Kuranit nga ushtarët amerikanë. Raportohet se një afgan me uniformë ushtarake dhe një tjetër me rroba civile kanë ndërmarrë sulmin në Kandahar.

Zyrtarët e Afganistanit thonë se vetëm njëri prej tyre ka hapur zjarr. Pavarësisht kësaj ata janë vrarë që të dy nga trupat e NATO.

NATO ende nuk ka bërë të ditur se cilës kombësi i përkasin dy ushtarët e vrarë.Ndërkohë, Alxhazira citon zyrtar amerikanë të cilët thonë se dy ushtarët janë të kombësisë amerikane.

Gjashtë trupa të NATO-s dhe 30 persona janë vrarë që prej nisjes së protestave javën e kaluar për djegien e Kuranit nga trupat amerikane. Ndërsa nga vitit 2007 deri në Janar 2012 janë vrarë nga sulmet rreth 70 anëtarë të NATO-s. /F.S/ (Shekulli Online)

Monumentet e kulturës drejt rrënimit

Thu, 01 Mar 2012 14:42:04 +0100

GJIROKASTËR- Çatitë dhe suvatë e jashtme përbëjnë problemin më të madh të shtëpive karakteristike gjirokastrite. Ky është rezultati i rivlerësimit të kryer në 56 shtëpi, që mbajnë statusin “monument kulture” të kategorisë së parë. Projekti i Drejtorisë Rajonale të Kulturës Kombëtare u realizua gjatë dy muajve të këtij viti, gjatë të cilit u evidentuan problematikat aktuale që mbartin këto godina, duke sjellë panoramën e gjendjes së tyre.

Sipas raportit të hartuar nga specialistët, përveç çative dhe suvatimeve të jashtme, kryesisht atyre me çatma, këto banesa shfaqin gjithashtu probleme edhe në mjediset e brendshme, si në tavane, dritare, porta, piktura murale apo të pjesëve me dru. Drejtori i këtij institucioni, Spartak Drrasa pohon se ky rivlerësim do t’u shërbejë specialistëve të monumenteve të kulturës për hartimin e politikave të posaçme për objektet që mbajnë këtë status.

Raporti i detajuar do t’i dërgohet institutit të monumenteve të kulturës, për të rivlerësuar gjendjen dhe nevojat aktuale të banesave në qendrën historike të qytetit të Gjirokastrës.

E.Bani (Shekulli Online)

Ahmetaj: Taksa e sheshtë është taksa e varfërisë, Bode: Na shpëtoi nga kriza

Thu, 01 Mar 2012 14:20:35 +0100

Ministri i Financave u shpreh në Kuvend se taksa e sheshtë është taksa moderne e drejtësisë sociale. Gjatë diskutimeve, Bode u shpreh se taksa e sheshtë është ligji i përqafuar nga mbarë bota. “Disa të majtë gjetën rastin për të sulmuar taksën e sheshtë. Ata janë çiçikovianë të majtë, kanë për qëllim t’i hapin rrugë taksës progresive që ka shpikur kryetari i tyre. Taksa e sheshtë është taksa më moderne. Kjo u ndërmor vite të shkuara dhe u deklarua si suksesi më i madh. Me taksa më të ulëta merren të ardhura dy herë më shumë. Kjo është arsyeja pse Banka Botërore e deklaron rastin e Shqipërisë si histori suksesi. Në vitin 2005, një infermiere paguhej 150 mijë lekë, sot ajo merr 340 mijë lekë. Shkoni thuajuni se janë më keq se në 2005-n dhe shihni a ju besojnë. Taksa e sheshtë na mbajti jashtë krizës, na bëri t’u qëndrojmë godtijeve që erdhën nga jashtë”, tha Bode.

Ahmetaj: Taksa e sheshtë, taksa e varfërisë

Deputeti socialist Arben Ahmetaj e ka cilësuar taksën e sheshtë si taksa e varfërisë gjatë diskutimeve në seancën e sotme të projektligjit “Për tatimin mbi të ardhurat”.

Sipas Ahmetajt, qeveria i merr 300 mijë lekë në vit çdo qyetari, ndërsa favorizon ata që kanë të ardhura të larta.

“Kjo taksë është një padrejtësi shoqërore, pasi i merr çdo qytetari 5 milionë lekë të vjetra në 10 vjet. Sipas taksës sonë progresiste që ju e hodhët poshtë, kryeministri Berisha do të duhej të paguante më shumë nga sa paguan tani, ndërsa 4 infermierë paguajnë në 10 vjet 20 milionë lekë më shumë”, tha Ahmetaj.

Shkarkimi i Spahiut, sot në Kuvend raporti i Komisionit Hetimor

Raporti i hartuar nga komisioni për hetimin e veprimtaërisë së ish-nënkryetarit të KLD-së, Kreshnik Spahiu,pritet të miratohet sot në Kuvend. Dy ditë pas përfundimit të punës dhe miratimit të raportit në Komisionin e ngritur për Spahiun, raporti shqyrtohet në seancën e sotme.

Pavarësisht dorëheqjes së Spahiut nga posti i nënkryetarit të KLD-së, raporti do t’i propozojë Kuvendit vendosjen e ndërprerjes së qëndrimit të tij në këtë detyrë.

Sipas raportit të hartuar vetëm nga deputetët e maxhorancës, pasi socialistët nuk pranuan të bëhen pjesë e këtij komisioni, Spahiu ka devijuar nga funksioni kushtetues i zv.kryetarit të KLD-së, duke e zëvendësuar atë me veprimtari politike.

Komisioni do t’i propozojë Kuvendit dërgimin e këtij raporti në Prokurorinë e Përgjithshme, me qëllim të vlerësohen shkeljet e konstatuara prej tij për ushtrimin e ndjekjes penale. / G. N. (Shekulli Online)

LSI: Përpjekjet për të bllokuar reformat janë në dëm të interesave të vendit

Thu, 01 Mar 2012 14:20:34 +0100

LSI bën thirrje për bashkëpunim mes palëve për çuarjen përpara të reformave të kërkuara nga BE. Në një konferencë për shtyp në mesditë, sekretari i përgjithshëm i Lëvizjes Socialiste për Integrim, Luan Rama, u shpreh se çdo përpjekje për të bllokuar reformat është në dëm të interesave të vendit.

“Plotësimi i kushteve të BE-së për të merituar statusin e kandidatit është çështje që ka të bëjë me interesat e vendit. Ato janë përgjegjësi që duhen realizuar dhe çdo përpjekje për ta bllokuar këtë proces është në dëm të interesave të vendit. Të mos shpresojë kush se do të ketë përfitime politike. LSI i fton të gjitha palët të kuptojnë domosdoshmërinë e përmbushjes së të gjitha detyrimeve në mënyrë që 100-vjetori i pavarësisë t’i sjellë Shqipërisë statusin e vendit kandidat për në BE”, tha Rama.

Sipas tij, qëndrimi i lidershipit të PS-së është absurd përballë një procesi që para së gjithash është detyrim kombëtar. “Socialistët kanë kontribut në gjithçka që është arritur në këtë vend, ndaj duhet të shfrytëzojnë përgjegjësinë për t’i çuar përpara këto arritje”, theksoi ai. / G. Ndoja

(Shekulli Online)

Muzika italiane në zi, vdes Lucio Dalla

Thu, 01 Mar 2012 13:18:34 +0100

Muzika italiane ka humbur krejt papritur një prej veteranëve dhe zërave të saj më të dashur.

Këngëtari italian Lucio Dalla është ndarë sot nga jeta në moshën 69-vjeçare. Kantautori që kompozoi “Caruso”, ka ndërruar jetë si pasojë e një ataku kardiak në Montreaux, në Zvicër, ku gjendej për një seri koncertesh.

Dalla ishte i pranishëm në Festivalin e Sanremos para pak ditësh, ku pati dy role: atë të autorit të “Nano” dhe drejtuesit të orkestrës.

Kënga më e njohur e Lucio Dalla-s është “Caruso”, versione të të cilës u kënduan edhe nga Luciano Pavarotti e Andrea Bocielli, duke u kthyer në suksese të padiskutueshme. Interpretimi i Pavarotit shiti rreth 9 milionë kopje, ndërsa pak më vonë versioni i Bociellit u shit në 16 milionë kopje në mbarë botën.

Hiti i parë i Lucio Dalla-s ishte “1 mars 1943” (ditëlindja e tij), një këngë që njohu suksesin në Festivalin e Sanremos e që do të bëhej e njohur me titullin “Gesu bambino”. / Gazmira Ndoja

(Shekulli Online)

Njohja e Kosovës, Serbia dëbon ambasadorin e Ganës

Thu, 01 Mar 2012 12:57:36 +0100

Mediat në Gana thonë se ky vend së shpejti do të mbyllë misionin në Beograd, pasi ky i fundit ka dëbuar ambasadorin e Ganës për shkak të njohjes së Kosovës.

Shefi i diplomacisë së Ganës, Alhaji Mohamed Mumuni, i ka thënë parlamentit se “marrëdhëniet e përzemërta” deri më tash ndërmjet dy vendeve, kanë pësuar dëme serioze pas njohjes së shtetësisë së Kosovës.

Portali “GanaËeb” shkruan se “autoritetet e zemëruara serbe” kanë bërë përpjekje që përmes ambasadorit në Beograd, Semjuel Valis Akjan, të bëjnë presion tek Akra zyrtare për të tërhequr njohjen.

Ministri Mumuni ka thënë se Ganës “nuk i ka mbetur gjë tjetër veçse të urdhërojë mbylljen e misionit të saj diplomatik në Beograd”.
Ambasada e Ganës në Beograd ka konfirmuar për mediat serbe se ambasadori i saj ka udhëtuar drejt Ganës, por jo edhe informacionet për mbylljen e përfaqësisë diplomatike.

Gana ka njohur pavarësinë e Kosovës në janar të këtij viti. / Kosova.com (Shekulli Online)

Makinat e luksit, Nissan GT-R me detaje ari 24 karat

Thu, 01 Mar 2012 12:57:35 +0100

Si të mos mjaftonte motori 3.8 litër V6 me 530 kuaj/fuqi, dizajni joshës dhe performance e denjë për një makinë garash, versioni i ri VIP i Nissan GT-R është i çmuar në kuptimin e plotë të fjalës.

E prezantuar në sallonin “Big Boys Toys” në Dubai, makina i ka mahnitur të gjithë me detajet në pjesën e pasme dhe anësore prej ari 24 karat.

Ky “xhevahir” i destinuar për tregun e Lindjes së Mesme, pjesën e brendshme e ka të veshur me lëkurë të punuar me dorë. Ajo është e disponueshme në 12 variante për një çmim prej 226 mijë dollarë. / G. Ndoja

(Shekulli Online)

Durrës, kapet me 900 gr kokainë, arrestohet

Thu, 01 Mar 2012 12:33:20 +0100

Një 45-vjeçar është arrestuar sot në Durrës për trafikim të lëndëve narkotike dhe armëmbajtje pa leje.

Burime për “Shekullin” bëjnë të ditur se Edmond Kondakçiu është kapur me 900 gramë kokainë, dy granata difensive dhe një sasi fishekësh.

Në momentin e prangosjes, policia ka sekuestruar sasinë e lëndës narkotike dhe dy granatat.

Ndërkohë, policia po heton në lidhje me bashkëpunëtorë të tjerë të të arrestuarit. / Mark Brunga (Shekulli Online)

Francë, sondazhet: Hollande më i besueshëm se Sarkozi

Thu, 01 Mar 2012 11:30:08 +0100

Dy të tretat e francezëve mendojnë se Francois Hollande është më i besueshëm se Nicolas Sarkozi përsa u përket çështjeve të ekonomisë dhe papunësisë. Rezultatet e sondazhit të kryer nga BVA janë publikuar sot në faqen online të Nouvel Observateur.

Sipas studimit të kryer, propozimet e kandidatit socialist janë më të besueshme për më shumë se gjysmën e francezëve (54%) kundrejt 34% për Sarkozi.

Pjesa më e madhe e të intervistuarve beson se Hollande do të luftojë kundër papunësisë (57% kudrejt 30% për Sarkozi). / G. Ndoja (Shekulli Online)

Stamboll, shpërthim pranë selisë së partisë së Erdoganit

Thu, 01 Mar 2012 11:30:07 +0100

Një shpërthim i fuqishëm ka ndodhur mëngjesin e sotëm në afërsi të selisë së partisë në pushtet të kryeministrit Rexhep Taip Erdogan në Stamboll.

Sipas CNN turk, nga shpërthimi kanë mbetur të plagosur 5 policë dhe 5 kalimtarë. Dëshmitarët në vendngjarje e kanë krahasuar forcën e shpërthimit me atë të një tërmeti.

Sipas shefit të policisë në Stamboll, bomba e telekomanduar ishte vendosur në një motoçikletë. / G. N. (Shekulli Online)

Bilt: Kosova s’është kusht i të gjitha kushteve për Serbinë

Thu, 01 Mar 2012 11:30:07 +0100

Shefi i diplmocisë suedeze, Karl Bilt, ka deklaruar se Serbia deri në fund të vitit, “jo vetëm që do të marrë datën e fillimit të negociatave për asociim, por edhe do të fillojë bisedimet me BE-në”.

Në një intervistë për gazetën “Politika” të Beogradit, Bilt vlerëson se ka rëndësi që është arritur përparim në dialogun e Beogradit dhe Prishtinës, duke theksuar se Kosova nuk është kusht i të gjitha kushteve për Serbinë.

Sipas ministrit suedez, si do që të definohet Kosova, “në interesin e Serbisë është që të ekzistojë stabiliteti nga dhe rreth Kosovës”.
I pyetur nëse mendon që BE-ja me të vërtetë do të shqyrtojnë ndonjë zgjiidhje të re siç është ndarja e Kosovës ose një autonomi më e madhe për veriun e Kosovës, Bilt ka thënë se “ndarja e Kosovës nuk merret parasysh”, por ka shtuar se njerëzve në veri u duhen siguruar kushte normale.

“Tani kemi çështjen sesi njerëzit në veri të Kosovës të jetojnë normalisht, dhe kjo gjithashtu është në interesin e Serbisë. Fakti se shteti i Serbisë dërgon atje para, është në rregull, por shtrohet pyetja e transparencës së këtyre transaksioneve”, ka thënë Bilt. / Kosova.com (Shekulli Online)

A mund të shkulen vërtet “bunkerët e Enverit”?

Thu, 01 Mar 2012 11:30:06 +0100

Ened Janina / Denis Dedej

Në momentin që Shqipëria ka humbur për herë të tretë mundësinë për të marrë statusin e vendit kandidat për në Bashkimin Europian, kryeministri Sali Berisha kërkoi dje nisjen e procedurave për heqjen e të gjithë bunkerëve nga Shqipëria të ndërtuara gjatë viteve 1975-1985. “Në mbledhjen e qeverisë, kryeministri Berisha kërkoi që të fillojë sa më parë procesi i ç’bunkerizmit të vendit. Ky proces, nëpërmjet përcaktimit të qartë të bazës ligjore do tu ngarkohet autoriteteve vendore, në mënyrë që ata vetë të përshtatin praktikat që atyre ju duken më të mundshmet, për realizimin e këtij procesi, sipas rrethanave të vendit”,- thanë burimet zyrtare të Këshillit të Ministrave pas mbledhjes së djeshme të qeverisë. Sipas tyre, kostot për heqjen e bunkerëve i hiqen qeverisë dhe më konkretisht Ministrisë së Mbrojtjes, dhe i kalojnë pushtetit vendor, pra bashkive dhe komunave në territorin e së cilave ndodhen bunkerët. Ministria e Mbrojtjes ka hequr dorë nga bunkerët që në vitin 2006, por tashmë qeveria kërkon që faturën e heqjes përfundimtare të tyre ta marrin vendorët.

Historia e bunkerëve “made in Albania”

Në fillim të vitit 1971 u zhvillua në Tiranë Plenumi i 12 i Komitetit Qendror të PPSH-së, i cili shqyrtoi tezat e Artit Ushtarak dhe projektet për Fortifikimin e vijave të mbrojtjes. Arti Ushtarak Popullor parashikonte që e gjithë Shqipëria të stërvitej dhe armatosej për t’i bërë ballë armikut. Ideja e fortifikimit të vendit mbështetej fortë nga kryeministri Mehmet Shehu, i cili u vendos vetë në vijën e parë së bashku me një grup specialistësh të talentuar siç ishin Mero Backa, Alfred Moisiu (Presidenti), Josiv Zegali etj.

Modeli shqiptar i bunkerëve u realizua pasi u konsultuan të gjitha sistemet e mëparshme që nga vija Marzhino deri tek lufta në Vietnam. Sipas literaturës së kohës, bunkerët shqiptarë ishin të aftë të përballonin të gjitha armët e kohës, por edhe armët kimike dhe bërthamore me fuqi deri në 20 kiloton. Prodhimi i bunkerëve nisi menjëherë dhe prova e parë e tyre u krye në vitin 1995 në Grykën e Këlcyrës. Prova e dytë u krye në Peldhja të Sarandës në vitin 1976.

Brenda bunkerëve u vendosën kafshë të gjalla dhe më pas nisi bombardimi i zonës me armët më të rënda që kishte ushtria shqiptare. Në Sarandë u hodhën mbi 1000 predha artilerie dhe më pas aviacioni hodhi mbi 100 bomba 50kg, 250kg deri në 500kg. Bunkerët i rezistuan bombardimeve dhe kafshët brenda mbijetuan. Përpara se çështja të dërgohej për miratim në Këshillin e Lartë të Mbrojtjes, u bënë edhe eksperimente të tjera dhe të gjitha dolën me sukses. Më pas Byroja Politike vendosi atë që njihet si bunkerizimi i Shqipërisë.

Fortifikimi masiv që nisi në vitin 1975 vazhdoi deri në vitin 1985, kur vdiq Enver Hoxha. Dhjetëra specialistë xhenierë shqiptarë u nisën në Europë, kryesisht në Suedi, Francë dhe Itali, ku arritën të lidhin kontrata për blerjen e makinerive të prodhimit të çelikut dhe të betonit special. Në Ministrinë e Mbrojtjes Popullore u krijua edhe posti i zv.ministrit për fortifikimet. Sistemi i bunkerëve është bërë në mënyrë rrethore në mënyrë që të mbrohen nga njëri-tjetri përmes dy vijave mbrojtjeje. E.J

Ushtarakët: Si bunkerizuam Shqipërinë për 10 vjet

Vetë njerëzit që kanë marrë pjesë në nismën e “çmendur” të asaj kohe për të ndërtuar një bunker për çdo ushtar, rrëfejnë detajet e ndërtimit të këtyre objekteve dhe kostoja. Të kontaktuar nga gazeta “Shekulli” disa prej personave që kanë qenë prezent dhe kanë marrë pjesë në ndërtimin e bunkerëve rrëfejnë se përpos faktit që është e pamundur që bunkerët të shemben, nuk ekzistojnë më rrugët për të shkuar tek çdo objekt pasi disa prej tyre ndodhen në zona tepër të thella.

Prej vitit 1975 deri në 1985 në Shqipëri ka pasur një aksion ushtarak për ndërtimin e bunkerëve të ndryshme. Qëllimi i asaj kohe ishte që çdo ushtar të kishte qendrën e tij të zjarrit. Për rrjedhojë, ushtarakët që kanë punuar në atë kohë tregojnë se deri në përfundim të ndërtimit të bunkerëve në Shqipëri numërohen rreth 700 mijë bunkerë. Në momentin e ndërtimit, qëllimi i ushtrisë në atë kohë ishte që të ndërroni këto objekte dhe të mbesnin përgjithmonë aty, pasi çdo ushtar duhet të kishte një qendër zjarri. Mundësia për t’i hequr ato është thuajse e pamundur, pasi ekspertët tregojnë se janë bërë prova duke u qëlluar me artileri drejtpërdrejtë dhe kanë rezistuar. E vetmja mënyrë për t’i hequr është shpërngulja. Por, ushtarakët tregojnë se në 28 mijë metra katrorë të vendit tonë janë ndërtuar në çdo cep bunkerët dhe zhvendosja e tyre nuk mund të bëhet. Ata tregojnë se në atë kohë u organizuan të gjitha ndërmarrjet dhe punonjësit për të fortifikuar vendin.

Sipas tyre, jo vetëm ushtarakët por edhe ndërmarrje të tjera jashtë saj morën pjesë në këtë procedurë. Personat që morën pjesë në këtë proces sqarojnë se ndërmarrjet i prodhonin, ndërsa ushtarakët merreshin me hapjen e rrugës, transport, si edhe saldimin e objekteve. Ekspertët bëjnë të ditur se për ndërtimin e bunkerëve është përdorur material shumë i veçantë, i cili nuk prodhohet më ditët e sotme. Bëhet fjalë për çimento dhe hekur special. Sipas specialistëve, çimento e përdorej kishte specifikën e saj 600 kilogram për centimetër katror ndërsa hekuri 1200 kilogramë për centimetër katror. Për t’i bërë më të kuptueshme këto shifra ato tregojnë se momentalisht çimento më e madhe që përdoret për ndërtimet është 150-200 kilogramë për centimetër katrorë. Për “bunkerizimin” e Shqipërisë qeveria e asaj kohe ka harxhuar miliarda dollarë, shuma të cilat janë shumë herë më të mëdha po t’i llogarisim me vlerën e stome.

Ushtarakët tregojnë për “Shekull”-in se kostoja për ndërtimin e një bunkeri me një frëngji (një qendër zjarri), kushtonte 150 mijë lekë (me kursin e atëhershëm). Ndërsa çmimi i këtij objekti me dy qendra zjarri shkonte 300 mijë lekë. Por, kishte edhe qendra zjarri për topa, të cilat nga pas janë të hapura, për të shkarkuar mbetjet, kostoja e të cilave ishte 200 mijë lekë. Krahas këtyre qendrave të zjarrit kishte dhe bunkerë të cilat ndërtoheshin në formën e tuneleve, brenda në mal, ku hapeshin rrugë në thellësi dhe ndërtoheshin qendra e zjarri dhe dhoma armatimi. Kostoja e tyre, sipas ekspertëve, ishte miliona lekë me çmimin e atëhershëm. Për shkak të fortësisë dhe përhapjes së gjerë, ushtarakët e cilësojnë si të pazbatueshëm vendimin e qeverisë për heqjen e bunkerëve nga i gjithë vendi.

Moisiu: Si bunkerizuam Shqipërinë me urdhër të Mehmet Shehu

Një ndër ekspertët e gjallë të bunkerizimit të vendit është ish-Presidenti i Republikës Alfred Moisiu, në atë kohë zv. Ministër i Mbrojtjes për çështjen e bunkerëve. Në një intervistë dhënë në vitin 2002 për gazetarin Blendi Fevziu, Moisiu ka shpjeguar me detaje se çfarë ndodhi në ato vite. Më poshtë pjesë nga intervista.

Ju keni qenë një nga ekzekutuesit e procesit të bunkerizimit të vendit. Kush ishte ideatori i bunkerizimit dhe a menduat ndonjëherë që kjo kishte një kosto shumë të lartë dhe ndoshta e panevojshme për vendin?

Mehmet Shehu që ishte edhe Kryeministër dhe Ministër i Mbrojtjes në atë kohë. Fortifikimi ka kaluar në disa faza. Fortifikimi ka filluar menjëherë në ’47-48. Pastaj strategjia u zhvillua, duke pasur për bazë zhvillimin e situatave ndërkombëtare. Në ’47-48, pasi u prishëm me Jugosllavët, filloi fortifikimi, por shumë i dobët. Më vonë kur dolëm nga Traktati i Varshavës, filloi përsëri dhe arriti kulmin në vitin ’74-75, pas shpartallimit të ashtuquajturit “grup armiqësor i Beqir Ballukut”. Në ’76 filloi fortifikimi në masë. Ç’është e drejta mendonin se kjo ishte një gjë e dobishme për t’u mbrojtur, por jo në atë shkallë sa u bë. Kam pasur një shef, gjeneral Mero Backen, me të cilin u thirrëm nga Ministri i Mbrojtjes që na thotë se me urdhër të Komandantit të Përgjithshëm duhet të projektonim për çdo rajon mbrojtjeje batalioni, 500 qendra zjarri, kështu quhen në gjuhën ushtarake bunkerët. Ne u tërhoqëm. Ai ishte urdhër dhe filluam të punojmë. Mendonim, po mirë në fushe, po aty ku nuk kalon dhe dhia ç’duhen. Shefi më thotë: “Alfred, është urdhër, është vendim politik. Nuk na takon neve ta mendojmë.” Bëmë tre ndarje. Nga 500 që ishte urdhri, bëme një me 250 bunkerë, një me 100 dhe në vendet e vështira. Bëj projektin dhe më thotë (Backa): “Po kush na e jep të drejtën ta gjykojmë këtë urdhër”. “I përgjigjem: “Është e vështirë, nuk bëhet ndryshe”.

Shtypi ka shkruar se në momentin e provës së këtyre bunkerëve, me urdhër të Mehmet Shehut, ju i keni provuar personalisht. Keni qenë brenda në kohën që bombardoheshin. Është e vërtetë?

Fantazia e gazetarëve i kalon ndonjëherë përmasat. Si mund të rrijë një njeri në një qendër zjarri, aq më tepër një gjeneral. Nuk mund të qëndrojë as edhe një ushtar. Kemi bërë dy prova të rëndësishme. E para, në grykën e Këlcyrës në ’75. Atje ka qenë edhe Spiro Koleka, si i dërguar i Byrosë Politike dhe Ministër i Transporteve. Prova më e madhe në Peladhja të Sarandës në ’76. Aty u hodhën një mijë predha në një rajon shumë të kufizuar. Aty kishim vënë lepuj, dhi, dele dhe dy qen kufiri. Qentë u vunë, pasi nga shqisat ata janë më afër njeriut. Pas bombardimit, instruktorët i morën qentë, të cilët e morën veten pas 30 sekondash. Pra, u arrit në konkluzionin, aty ishte një komision i tërë shkencor, i përbërë edhe nga mjekë, aty ka qenë edhe Z. Sabit Brokaj si mjek i shquar që ishte, që njeriu atje mund të rezistojë. Parimi i ndërtimit të fortifikimit u arrit pas një pune të madhe studimore. U studiua vija Zigfrid, Metaksa, Stalin, etj. dhe parimi i parafabrikateve u mor nga parimi amerikan, që u përdor në Vietnam. Kryesore ishte masiviteti dhe shpërndarja. Sepse të bëje qendra zjarri që ti rezistonin goditjeve të mëdha, ato duhet të ishin jashtëzakonisht të kushtueshme, siç ka pasur në kufirin mes Finlandës me Rusinë. U arrit në konkluzionin, që të bëheshin këto bunkerë që janë bërë. Që sipas konkluzioneve të komisionit shkencor, dolën të rezistueshme për mjetet që njiheshin në atë kohë.

(Shekulli Online)

Topi-Topalli përplasen në Kushtetuese për kompetencat

Thu, 01 Mar 2012 11:30:06 +0100

Luis Tanushi

Kushtetuese shqyrtoi dje konfliktin ndërmjet institucionit të Presidentit dhe Kuvendit lidhur me procedurën e emërimit të gjyqtarëve për në Gjykatën Kushtetuese. Thelbi i përplasjes mes dy institucioneve është fakti që Presidenti Bamir Topi dërgon në Kuvend emrat e juristëve që mendon se duhet të zgjidhen në Gjykatën Kushtetuese, ndërsa Kuvendi nuk i miraton ato duke bërë që anëtarët ekzistues, edhe pse i ka mbaruar mandati, të qëndrojnë në detyrë. Nga ana tjetër Kuvendi po mban dekrete pezull duke mos u shprehur as me pranim, dhe as me rrëzimin e tyre. Për sa kohë që dekretet qëndrojnë pezull, Presidenti Topi nuk ka mundësi të propozojë emra të rinj.

Për institucionin e Presidencës, Kuvendi në shkelje të hapur me ligjin ka bllokuar kompetencat e Presidentit duke kthyer mbrapsht dy dekrete të tij dhe duke zgjatur kështu në mënyrë të jashtëligjshme mandatin e dy anëtarëve të Gjykatës Kushtetuese. I menjëhershëm ishte reagimi i Kuvendit, përfaqësuesit e të cilit u shfajësuan duke deklaruar se parlamenti ka zbatuar Kushtetutën dhe vendimin e Gjykatës Kushtetuese lidhur me rotacionin e gjyqtarëve. Për mazhorancën, një e treta e anëtarëve të Kushtetueses duhet të rinovohen një herë në tre vjet, dhe dy dekretet u kreut të shtetit u kthyen mbrapsht, pasi kishin ardhur në parlament jashtë afateve. Sipas përfaqësuesve ligjorë të parlamentit, gjyqtarët aktualë duhet të qëndrojnë në detyrë deri në 2013 kur bëhen tre vjet nga rotacioni i fundit i realizuar në 2010. Në ditët në vijim, Gjykata Kushtetuese pritet të japë vendimin e saj për të zgjidhur përfundimisht konfliktit e kompetencave ndërmjet Kuvendit dhe Presidentit për emërimin e tre anëtarëve të Gjykatës Kushtetuese, të cilëve u ka mbaruar mandati.

Kuvendi: S’kemi konflikt me Topin, dekretet erdhën me vonesë

Përfaqësuesit ligjorë të Kuvendit kërkuan në seancën e djeshme gjyqësore rrëzimin e kërkesës së Presidentit për zgjidhjen e kompetencave për emërimin e gjyqtarëve si të pabazuar. Sipas përfaqësuesve të Kuvendit, pas dekretimit të emrave për në Gjykatë, Presidenti nuk ka më asnjë kompetencë dhe se gjithçka i takon Kuvendit.

Drejtori Juridik i Kuvendit, Lulzim Lelcaj shpjegoi dje se Presidenti i Republikës, me kompetencën e tij për të emëruar gjyqtarët e Gjykatës Kushtetuese, do të duhej ta kishte zbatuar dispozitën e rotacionit të anëtareve të me një të tretën. Një tjetër pretendim i shprehur në sallën e gjyqit nga ana e Kuvendit, ishte mos legjitimimi i Presidentit Topi për të iniciuar këtë proces kushtetues pasi sipas tyre, nuk ekziston një mosmarrëveshje kompetencash, për sa kohë që presidenti nuk është subjekt ne konflikt apo subjekt i cenuar drejtpërdrejt nga një mosmarrëveshje e mundshme.

“I paargumentuar është edhe pretendimi vijues i kërkuesit se Kuvendi i Shqipërisë ka marrë përsipër të vlerësojë në mënyrë të ndryshme kompetencat e Presidentit të Republikës dhe kompetencat e vetë Gjykatës Kushtetuese. Sjellim në vëmendje të Gjykatës se Kuvendi është i pavarur në vendimmarrjen e tij. Edhe Gjykata Kushtetuese është e pavarur në vendimmarrjen e saj. Në këto kushte, të pretendosh se Kuvendi i ka marrë kompetencat Presidentit dhe Gjykatës Kushtetuese, do të thotë se duhet të provosh se Kuvendi ka zëvendësuar GJK dhe ka deklaruar mbarimin e mandatit të anëtarëve të saj”,- tha Lulzim Lelcaj, Drejtor Juridik i Kuvendit.

Duke mbrojtur qëndrimin e parlamentit për të bllokuar rotacionin lidhur me dekretet e presidentit Bamir Topi për në Gjykatën Kushtetuese, Lelcaj, u shpreh se një e treta e anëtarëve të gjykatës më të lartë në vend, rinovohet njëherë në tre vjet, dhe dy dekretet u kreut të shtetit u kthyen mbrapsht, pasi kishin ardhur në parlament jashtë afateve. Kushtetuta nuk e lejon që mekanizmi, dekret president-pëlqim Kuvendi, të vihet në lëvizje më parë sesa të kenë kaluar tre vjet nga ripërtëritja e fundit. Ky mekanizëm, sipas Lelcaj, mund të zbatohet vetëm për tre mandate në një raund ripërtëritës.

“Në situatën jonormale të krijuar, Kuvendi kishte ripërtëritur dy mandate (deri në qershor 2010) dhe me daljen e vendimit të Gjykatës Kushtetuese, kishte edhe katër dekrete në pritje. Në këto kushte, Kuvendi mund të operonte vetëm me njërin dekret, i treti mandat që plotësonte 1/3 e domosdoshme, sipas përcaktimit kushtetues. Ndërkohë për tre dekretet e mbetura pezull, Kuvendi e kishte të pamundur që të vijonte procedurën, sepse rotacionin me 1/3 tashmë e realizoi me dhënien e pëlqimit për tre gjyqtarët”,- theksoi në fjalën e tij përfaqësuesi i Kuvendit.

Presidenca: Kuvendi na ka bllokuar punën me dekretet pezull

Përfaqësuesit e Presidencës e cilësuan antikushtetues ndërhyrjen e Kuvendit duke bllokuar rotacionin e gjyqtarëve në Gjykatën Kushtetuese. Këshilltari juridik i presidentit, Artur Metani, deklaroi se ndërprerja e menjëhershme e procedurave të shqyrtimit nga Kuvendi të tre dekreteve të Presidentit, është një mekanizëm antikushtetues, i cili ka bllokuar procedurat kushtetuese për emërimin dhe për plotësimin e përbërjes së Gjykatës Kushtetuese.

“Rëndësi ka që të ketë një vendim të Gjykatës që të urdhërohet Kuvendi që dekretet ti nënshtrohen votimit. Logjika ligjore më detyron t’ju them se kjo vendimmarrje duhet të ngarkojë Kuvendin që ti votojë ato dekrete të Presidentit në seancë plenare, pasi deri më tani Kuvendi s’ka marrë asnjë vendim duke sjellë që dekretet e Presidentit të rrinë në vend. Dhe shtyrja e afatit të mandateve të tre anëtarëve në detyrë është bërë me një vendim të brendshëm të Kuvendit jashtë çdo kriteri Kushtetues”,- theksoi Këshilltari Metani. Për institucionin e Presidentit, çështja në shqyrtim është një çështje themelore e ndarjes së pushteteve, e shtetit të së drejtës dhe garancive kushtetuese të ofruara për ushtrimin e kompetencave që institucionet kanë.

“Zbatimi i detyrimeve kushtetuese duhet të jetë i harmonizuar gjithmonë me parimet themelore të ndërtimit dhe funksionimit të kushtetueshmërisë dhe ligjshmërisë. Vetëm një harmonizim i tillë bën të mundur rregullimin e çështjeve që shtrohen për zgjidhje përpara institucioneve publike”, tha Metani. Sipas përfaqësuesve të presidentit, nëse do të pritej që procedura e votimit të anëtarëve të Gjykatës Kushtetuese të kryhen vetëm në prill 2013, atëherë do të gjendeshim para zgjatjes së mandateve 9 vjeçare, për 3 anëtarë, në 12 vjet. Në vlerësimin e presidentit, thuhet se mandatet e anëtarëve të Gjykatës Kushtetuese nuk mund të zgjaten apo kufizohen me vendim të Kuvendit, sikurse është disponuar konkretisht në vendimin e Kuvendit, i cili shprehet se çështja e shqyrtimit të dekreteve të Presidentit të Republikës do të kryhen në prill 2013, duke zgjatur praktikisht mandatin e anëtarëve të cilëve u është deklaruar mbarimi me vendim të Gjykatës Kushtetuese në prill dhe maj 2010.

Ata që ikin dhe kush propozohen

_U ka mbaruar mandati_

1. Admir Thanza

2. Petrit Plloçi

3. Xhezair Zaganjori

_Propozohen nga Presidenti_

1. Ardian Leka

2. Artan Hoxha

3. Edlira Jorgaqi

Pyetjet e gjyqtarëve për avokatin e Presidentit

_Pse kemi këtë situatë sot, ku për 3 anëtarët është shtyrë mandati me vendim të Kuvendit me 3 vjet?_

Kuvendi duhej t’i kalonte për votim dekretet, pavarësisht pëlqimit apo jo të tyre, por ai duhej të zbatonte procedurat, ose ti miratonte ose ti rrëzonte ato me votim në Kuvend. Por ky I fundit refuzoi ti kalonte për shqyrtim edhe në komisionet përkatëse parlamentare. Pra ajo që kërkohet sot nga Presidenti I Republikës është që Gjykata Kushtetuese të zgjidhë konfliktin e kompetencave mes dy institucioneve.

_Ju pretendoni që Kuvendi ka marrë një vendim antikushtetues, si mendoni ju se si zgjidhet kjo çështje?_

Rëndësi ka që të ketë një vendim të GJK-së të vendoset që të urdhërohet Kuvendi që dekretet ti nënshtrohen votimit. por logjika ligjore më detyron t’ju them se kjo vendimmarrje të ngarkojë Kuvendin që ti votojë ato dekrete të Presidentit në seancë plenare, pasi deri më tani Kuvendi s’ka marrë asnjë vendim duke sjellë që dekretet e Presidentit të rrinë në vend. Dhe shtyrja e afatit të mandateve të 3 anëtarëve në detyrë është bërë me një vendim të brendshëm të Kuvendit jashtë çdo kriteri Kushtetues.

_Ju mendoni se kjo duhet parë kaq strikt si çështje ?_

Rëndësi ka që të ketë një vendim të Kuvendit me votë, i cili zhbllokon dhe situatën.

_A ka pasur ndonjë përpjekje mes institucioneve për ta zgjidhur këtë mosmarrëveshje?_

Dy institucionet bashkëpunojnë mes tyre pasi një dekret I Presidentit I kalon Kuvendit për miratim. Por mendoj se nuk është e domosdoshme që Presidenti të konsultohet me Kuvendin për emrat që ai mendon t’i dekretojë, pasi kjo është në kompetencat e tij për sa i përket vendimmarrjes së pavarur të institucionit. Unë mendoj se GJK duhet të ndërhyjë pasi ky vendim ka të bëjë me ndarjen e pushteteve dhe pavarësinë institucionale. Vendimi i Kuvendit duke sjellë dhe shkeljen e afateve të zëvendësimit të anëtarëve të GJK-së, jashtë çdo kompetence duke cenuar kështu integritetin e kompetencave të Presidentit të Republikës.

Pyetjet e gjyqtarëve për avokatin e Kuvendit

Duket se kjo çarje institucionale ka të bëjë me 3 vendime të Kuvendit të marra gjatë vitit 2010. ka një interpretim në nenin 125 të Kushtetutës dhe për të gjitha këto cili është interpretimi juaj për këto çështje. Pasi kemi një shtyrje me 3 vjet të mandateve të anëtarëve të GJK-së?

Kuvendi ka vendosur shtyrjen e mandateve dhe ky vendim është I pandryshueshëm përsa kohë kjo situatë nuk zgjidhet nga GJK-ja…

_Çdo të thotë kjo?_

Komisioni i Ligjeve e ka përcaktuar qartë që me këtë shtyrje nuk ka vakanca ligjore në GJK, ku me vendimin e tij ka krijuar hapësirën e duhur të funksionimit të këtij institucioni. Ndërsa sa I përket bashkëpunimit institucional, ai ka funksionuar me anë të disa letrave në nivele të sekretarëve të Përgjithshëm të të dy institucioneve. Ku sekretari i Presidentit i drejton letra sekretarit të Kuvendit.

Çdo të thotë kjo? Që të jemi më të qartë në atë që po diskutohet këtu, Kuvendi nuk mund të shtyjë mandatet pafundësisht me vendimet tuaja, jashtë çdo tagri. Ju pretendoni që mund ti shtyni mandatet sipas qejfit.

_…Ndërhyn avokati i Kuvendit gjatë pyetjes_

Prit se nuk kam mbaruar akoma. Jini më i durueshëm, ashtu siç jemi treguar ne me ju, duke i shtyrë seancat sa herë donit. Prandaj me i qetë dhe bëni durim.

_Ju thoni në vendimin tuaj që nuk ka vende vakante deri në 2013-ën. Si mendoni duhet të bëhet zëvendësimi i anëtarëve për të cilët Presidenti thotë që u ka mbaruar mandati?_

Kuvendi ka vepruar me atë vendim për të zgjidhur vakancën institucionale të momentit por ky vendim nuk ka karakter ligjor, por ai është i natyrës së posaçme dhe akti është i pacenueshëm në brendinë e tij, sa i përket funksionimit të GJK-së.

(Shekulli Online)

Sekretet e një liceisteje që nuk shikon

Thu, 01 Mar 2012 11:30:06 +0100

Valeria Dedaj

Kur e shikon për herë të parë krijon menjëherë përshtypjen e një zonjusheje të re, e cila ka shije tepër të hollë në kombinimin e veshjeve të saj. Me një buzëqeshje të ëmbël, me flokët gështenjë me onde, me një golf ngjyrë lejla, një çantë që mban në duar dhe me pelerinën ngjyrë kafe me kuadrata hedhur mbi supe… Kjo është gjimnazistja Doliana Veliaj me origjinë nga Mallakastra, e cila ka banuar në qytetin e Vlorës derisa mbushi moshën 14-vjeçare. Në jetën e përditshme e sheh të veshur thjesht dhe më së shumti në mënyrë sportive. Ndërsa në raste të veçanta u kushton më shumë vëmendje detajeve dhe veshjes klasike. Nga afër i dallon ngjyrat dhe përherë mundohet që t’i përshtasë veshjet me modën.

Që në fëmijëri ka vuajtur prej mungesës së shikimit por falë mësuesve personalë të financuar nga një shoqatë italiane e të verbërve përfundoi filloren dhe tetëvjeçaren në Vlorë. Në vitin 2009-2010 përfundoi 9-vjeçaren në “Institutin e të verbërve në Tiranë”. Ishte një vit që i shërbeu për të kuptuar më tepër vështirësitë e bashkëmoshatarëve të vet që vuajnë nga verbëria. Aty, kuptoi se ”izolimi” nuk i ndihmonte dot për t’u përshtatur me ambjentin e jashtëm.

Doliana, studion tani në vitin e dytë për kanto. Përveçse i pëlqen të dëgjojë muzikë klasike, këngëtarët e saj të preferuar ngelen Whitney Houston dhe Celine Dion. Endrra e saj është që nesër të jetë një kritike e zonja në fushën e artit, përkatësisht në muzikologji.

Ditëve nga e hëna deri të premten ajo është në shkollë deri në orën dy, kurse fundjavave, sigurisht që është ndryshe nga ritmi i javës edhe pse asnjë ditë nuk është njësoj sepse për Dolianën “asnjë ditë nuk duhet të jetë monotone”… Pasditeve e gjen më së shumti në shtëpi, por edhe në ndonjë kafe me shoqërinë. Sekretet e saj i ndan më shoqet e ngushta, të cilat i do shumë. Nëse nuk del pasditeve me to, dëgjon muzikë, punon diçka në kompjuter, studion ose këndon. Por shpesh del dhe në ambientet e qeta të natyrës sepse aty ndihet mirë kur do të shplodhet.

Kot nuk thonë se “rastësia është mbreti i botës”… Dhe në rastin e Dolianës ka qenë rastësi. Sepse dëshira e saj për muzikën filloi në periudhën kur takoi mësuesen e pianos në ‘Institutin e të verbërve”, Dezdemona Orjetin. Më vonë prapë rastësia e bëri të takojë mësuesen e kantos në lice Alma Strazimirin. Prandaj përherë e quan veten me fat që në jetë ka takuar vetëm persona të mrekullueshëm që për të kanë qenë një shtyllë e fortë mbështetëse për të vijuar studimet deri këtu ku është sot.

Doliana mërzitet përherë kur dikush i drejtohet duke i thënë “sa gjynah’… për këtë i vjen keq sepse kanë krijuar iluzione pa e njohur, ndaj nuk ndihet fort mirë. E shqetëson realiteti në Shqipëri…! E shqetëson mentaliteti i ngushtë konceptual për individët me aftësi të kufizuara. Beson në Zot, por mbi të gjitha në aftësitë e saj! Sepse beson dhe vlerëson çdo gjë që ka. Shoqëria, familja dhe njerëzit më të dashur, nuk e kanë lënë asnjëherë të mërzitet ose të ndihet keq. Aktualisht jeton vetëm me mamin dhe babin. Dhe nuk e ndien kurrë mungesën e të vëllait dhe as të motrave pavarësisht se jetojnë jashtë shtetit, ngaqë komunikon shpesh me ta dhe përherë e shohin si më të voglën e shtëpisë dhe për këtë ndihet“e priviligjuara e fatit”. I mungon gjithçka që ka pasur në fëmijëri… I mungon shoqëria që e takon vetëm kur shkon në Vlorë, i mungon koha kur nuk i duhej të mbante dieta dhe shëtitjet bregut të detit.

Mungesa e shikimit…

“Është njëlloj sikur t’i thuash dikujt që a të mungon një shqisë që nuk egzston, ose e ndien mungesën e të fluturuarit, e normal që jo”- thotë Doliana. Njeriu në jetë mundohet ta gjejë sesi do ta zgjidhë problemin dhe jo pse i ka ndodhur. Lidhja me të afërmit ka qenë përherë shumë e ngushtë, pasi qëkur ka lindur ka qenë e verbër dhe kjo e ka bërë të mos ndihet ndryshe nga të tjerët. “Nëse do më ndodhte më vonë do ta kisha përjetuar më rëndë”, thotë ajo. Ndihet njëlloj si të tjerët sikur nuk i mungon asgjë… Motoja e saj në jëtë është se gjithçka mund të arrihet nëse ke dëshirë, vullnet dhe guxim.

Emri: Doliana Veliaj
Mosha: 16 vjeç

Jeta: Studion në lice për kanto dhe është një ndër të rejat me më shumë pasion për jetën, ndoshta edhe në krahasim me bashkëmoshataret që nuk kanë kufizime si ajo… Nuk i mungon asgjë praktike në jetë, dhe sigurisht nuk i mungon as dashuria e më të afërmëve e shoqërisë. Madje ndihet e përkëdhelura e tyre…

(Shekulli Online)